تومات مدني : هربنا (بالتكتك) من الدعم السريع .!!
كتب / عبدالرحمن جبر
أسترجعت الفنانات تومات مدني مروة وصفاء عبدالرحمن شريط الألم لحظة دخول مرتزقة الدعم السريع الي مدينة ود مدني بقولهن : مشهد الدعامه داخلين مدني كان مخيف ومرعب للحد البعيد واحساس غريب من الرعب كل الناس متوجسه وخايفه أحاسيس ملخبطه المهم بين دخلوا وما دخلوا دي براها حرب نفسيه ما طبيعية ، بعدها أنطلقت أصوات المدافع والطيران الناس بدت تطلع من مدني شكل الناس وهي طالعه من مدني ده مشهد ما بنقدر ننساهو طول عمرنا في مدني حسره وحزن وصراع مابين نطلع ولا نقعد الناس كلها طلعت من مدني خلال يومين فقط وأصبحت المدينة خاليه تماماً إلا القليل مشاهد تقطع القلب الماشي سيراً على الاقدام والراكب (كارو) والراكب عجله والعيان طلع من المستشفى فما بكون عندك حلل غير انك تطلع مؤشر حقيقي انو في خطر قادم بعد أن بدأت السرقات يا اصلاً جنود الدعم السريع أول ما دخلو على طول سرقه و ضرب واغتصاب وقتل وترويع تماما البيوت كلها اتسرقت، والله العظيم عشنا أحساس مؤلم وقاسي جداً لازمنا لإيام طويلة فمازلنا نفتكر منظرنا ونحنا راكبين (التك تك) ومنظرنا ونحنا ماشين علي ارجلنا لمسافات طويلة جداً ولا نجد مواصلات نركبها .
